Pour les arabophone 
باقي كانعقل فاش كنت صغير، كنت كانتصخر نجيب الحليب عند مول الحانوت، و كان ديك ساع الحليب عندو واحد القيمة فشكل واخا كان داير 52 ريال، كاتوصل 8 مكاتلقاهش، مول الحانوت كان ديما كايخبي الحليب ديال الزبائن ديالو حتا كايجيو ليه، و كان كايبيعو ليك بحال إلى بايع ليك الشراب، كايديرو فميكة كحلة، و كايڭوليك " سير جري، و ماتوريه لحد ! "
أنا شخصياً مكانش كايعجبني الحليب، كان كايعجبني اتاي .. اتاي بفليو .. أكثرية داك اتاي لي كان كايشيط من الفطور و كنت كانجي مع 12 من المدرسة و كنلقاه بارد .. كنت كانعطيه صلية، هو و هنريس.
فديك الوقيتة لي كنت عاطيها لأتاي، كان الحليب كايتزاد شوية بشوية و الدراري ديال الحومة حتا هوما كايطوالو شوية بشوية.. و مادربت الفڭد فراسي حتا درت 16 لعام، وكعيت كعية مقودة ملي عرفت بلي الإنسان مكايبقاش يطوال فاش كايدير 20 سنة حيت ديك الساع فات عليا الفوت.
تماك فين بديت كانسكر بالحليب ليل و صباح، و كنت فيما كانمشي نشريه كانتقاتل باش نجيب ديال الكرطون ومانجيبش ديال الميكا، حيت كنت كنقرا فلومبالاج بلي فيه الكالسيوم و الصوديوم و الحديد و البيترول و الحنكليس و داكشي ... و كنت كانتيق!
ماعليناش، تزاد الحليب... مرة جوج دريال .. مرة ربعة دريال، و المواطن مكمدها و ساكت، حيت ديك الساع ماكان لا فايسبوك لا ربيع (عربي) و هاهو اليوم ولا بسبعين ريال، و جا فايسبوك و جات رياح ديال التغيير لي من المفروض تزعزع شوية بنادم وتخليه يتحرك ... ولكن المواطن مازال ساكت، ماعدا السخط الفايسبوكي و شي محاولات متواضعة للدعوة للمقاطعة فالمواقع الإجتماعية.
ولكن بلاتي بعدة شنو هو السب ديال الزيادة ديال أسعار الحليب ؟ كولشي بدا ملي شركة "مركز الحليب" قررات تحلب شي بقر آخر من غير البقر ديال دوك المئة وعشرين ألف مربي ديالها، للتدكير، سنطرال لتيير هي لي كاتستحود على أكبر نسبة فسوق الحليب ومشتقاته، وكثر من الثلثين ديالها ملك للشركة الفرنسية دانون، لي مني جات وهي كاطير فالمدراء المغاربة و تحط بلاصستهوم الزوعر.
فالبيان ديال الشركة، ڭالت بلي كاين جوج ديال الأسباب رئيسيين :
السبب الأول : هو الزيادة فالثمن لي كاتخلصو الشركة لمربيين الابقار إبتداءً من فاتح غشت .
السب الثاني : هو الضرفية الإقتصادية العالمية لي خلات المواد الأولية ترتفع وبالتالي زادت من تكلفة الإنتاج.
وزادت كملاتها وجملاتها ملي ڭالت بلي هامش الربح ديالها ماغاديش تستافد منو هي حيت غادي يطلع غير من 0.24 ل 0.25 ..
دابا خلينا من هاد الزواق كامل، جوج ديال الشركات لي شادين أكبر نسبة فالسوق محتاكراه أقلية، سنطرال 63% و كوباك 20% الأولى زادت فالأسعار على غفلة و الثانية تبعاتها من بعد 24 ساعة ، واش هادشي مكايخليناش نڭولو بلي القاضية عاجنينها و خابزينها بيناتهم ؟ وبلي كاين إتفاق على الأسعار، وهادشي كايتعتابر من الممارسات المانعة للمنافسة و لي المتضرر الأول منها هو المستهلك.. عاد الشركات الصغرى، ولكن فهاد الحالة الشركات الصغرى غادي تتبع جودة و سنطرال باش تحافض على الأرباح ديالها . و فاش الصحافة سولات المدير العام ديال كوباك قاليهم " مكاين حتا شي إتفاق على الأسعار وبلي " هاد الإرتفاع كان منتظر من شحال هادي، غير سنطرال دارتو البارح و حنا درناه ليوم" هادا ماكان .. يعني بالعربية حتى هو #مفراسوش.
ههههه عالام فالوقت لي كانكتب فيه هاد الجملة سقت الخبار بلي واحد التعاونية ديال الحليب كاينة فتطوان سميتها COLAINORD حتا هي زادت فالحليب.
دابا واش الحكومة عندها دخل فهادشي ؟ الصورة لي كاتبان هي أن الحكومة ماعندها دخل فهاد الشي، فرعوا لينا راسنا بالسوق (الحرة) و الشركات الخاصة و قانون العرض والطلب و القيامة الكحلة... ولكن أنا لي عارف هو أن الحكومة من مسؤولتها الحفاض على القدرة الشرائية للمواطن، ولكن بلاتي ! حنا ماعندناش حكومة، حنا عندنا خريوة جارية خوينزة غادة وكاتقصاح و كاتكحال و كاتجمع عليها الدبان .. حنا عندنا شعب مضرور و هازو حتا القاع و ساكت و صابر .. حنا عندنا لوبيات وشركات كايديرو مابغاو فالسوق، كايديرو مابغاو فالبلاد، و كايتحكمو فالسياسة و فالسياسيين عن طريق النفود ديالهم ... حنا عندنا سياسيين ماشي رجال، مكايدافعوش على مصالح الشعب ولكن كايدافعو على مصالح بعضياتهم .. مكايبكيوش على المواطن الضعيف لي ربعة دريال تقدر تزعزع ليه العيش ديالو اليومي، ولكن كايبكيو على الفلوس و المناصب و الامتيازات، حنا عندنا صحافة و إعلام مكايعطيوش قيمة لبحال هاد الأحداث و مكايعبئوش ليها... حنا عندنا شعب مازال ماقادرش يقاطع واخا عارف بلي هاداكشي لي كايشرب أصلاً راه ماشي حليب، حنا عندنا طبقة (متوسطة) لي كاتقول " وا ربعادريال مادات ماجابت" و معرفاش بلي ديك الربعة دريال إلى ضربتيها ف جوج و عاود ضربتيها فواحد 900 مليون لتر ديال الحليب سنوياً راه كاتولي ملاير .. ملاير .. ملاير .. وفين كايمشيو هاد الفلوس ؟ لا لا، مكايمشيوش عند المربيين ديال الأبقار، حنا را ماشي بڭر باش يدوزوها علينا .. حنا را ماشي مازال كانرضعو البزولة (واخا ماكرهناش نرضعوها دابا نيت اللهم هي ولا هاد الحليب ديال الغبرة) دوك الفلوس كايمشيو لجيوب الشركات الرأسمالية الكبرى لي دايرة مابغات، دوك الفلوس كيزيدو يغنيو الأغنياء وكايزيدو يفقرو الفقراء، دوك الفلوس راكم كاملين عارفعينهم فين كايمشيو وساكتين.
بنادم كايسحاب ليه بلي المقاطعة ماغاتنفع فوالو و بلي الشركات ماغاديش يتأثرو إلى 400.000 مغربي و مغربية قاطعو، هي بصح ماغادي تنفع فوالو إلى بقينا كانقولو بلي ماغتنفع فوالو. ولكن إلى كل واحد من هادوك الربعمية ألف واحد قاطع، و أثر على المحيط ديالو باش يقاطع ديك الساعة عاد غادي تكون شي نتيجة، كاينين شي ناس مؤثرين لي منا و بحالنا، كيڭولو بلي هوما ولاد الشعب، عندهم مئات الآلاف فالمواقع الإجتماعية، و ديما كايبقاو يهدرو بسميت الشعب. إلى جا غير 1% منهم وسخر دوك الطاقات لي عندو للدعوة للمقاطعة، واهلي فين غانوصلو . يمكن مايقدروش حيت خصهم غير يضحكوا (على) بنادم و يربحو فليسات على ضهرو و صافي حدك تم.
المغاربة ماعارفينش بلي إلى نزلو المبيعات ديال الحليب غير ب 40% ف 48 ساعة را غادي تكون كارثة و خسارة فادحة للشركات، حيت الحليب منتوج لي المدة الإستهلاكية ديالو قصيرة بزاف، و الخسارة مايمكينش ليها تعوض ببيع نفس المنتوج لاحقا.
هادشي علاش قلبت ليكم على 16 لسبب غادي يشجعوكم باش تقاطعو الحليب أو تنقصو من إستهلاكو :
1 - هادك شي لي كاتشربو را ماحليب ما تا تلعبة، هاداك سميتو " الماء و جالالة " خلاتها الحاجة، مايدوخوكومش بديك ISO 9001 را ماكاين والو من داكشي.
2 - واش بالرجولة كايسحاب ليكم بلي البقر ديال المغرب قادر ينتج كثر من 3 مليون لتر من الحليب الصافي يوميا ؟
3- هداك الحليب ديال ابقار لي العلف ديالها أصلاً ماشي طبيعي 100% و كايحتاوي على مواد كيميائية و مواد حافظة و بزاف ديال الماء.
4 - الحليب ديال اليوم عامر بالهرمونات و الأوساخ لي كاتناولها الأبقار و كايئثر هادشي على الأجهزة ديال أجسامنا.
5 - مامزيانش دير عصير ديال الفواكه بالحليب،حيت ماكايخليكش تستفد من الفوائد ديالها.
6 - مامزيانش دير شاي بالحليب، حيت الحليب كايفقد للشاي التأثير الإيجابي ديالو على الأمعاء.
7 - مامزيانش تشرب القهوة مع الحليب، حيت كاتساعد فتفاقم مشكلة نخر الأسنان. و فاش كايتخلط الكافيين مع الكازئين كاتصعاب عملية الهضم.
8 - مامزيانش تشرب الحليب قبل أو بعد الدواء، حيت كايوقع واحد التفاعل الكيميائي مابين الكلسيوم و المعادن لي فالدواء، وهادشي كيمنع متصاص الدواء.
9 - مامزيانش تشرب الحليب و الشكلاط،حيت الحليب فيه الكالسيوم ، و الشكلاط فيه حامض الأكساليك، وفاش كاتخلطهوم بجوج كتصنع واحد اللعيبة سميتها كلسيوم الأكساليك، وهادي إلى دابت ليك أجي دفل عليا، تقدر دير ليك فتجفف الشعر، الإسهال أو بطء النمو.
10 - كاين شي بلدان لي نسبة الإستهلاك ديالهم للحليب و مشتقاته ضئيلة بحال الصين و مكايعانيوش من الأمراض لي كايسببها الحليب بالشكل لي كتعاني منو البلدان لي كتستهلك الحليب بزاف.
11 - كاين بزاف ديال العلماء لي كايرجحو أن الحليب له علاقة بأمراض السرطان الشائعة بحال سرطان الثدي،سرطان الأمعاء، وسرطان البنكرياس.
12 - 70 بالمائة من سكان العالم ماكايقدروش يهضمو اللاكتوز (سكر الحليب)، و إلي كايتسبب فعدة مشاكل صحيَّة.
13 - بروتينات حليب الأبقار تعد هي السبب الرئيسي لأمراض السكري لدى الأطفال فميريكان.
14- الحليب كايسد العروق والشرايين و كايلصق الكولسترول العاطل.
15 - الحليب كايمنعكم من تناول الفواكه لي درجة الحموضة فيها قل من 4.6 بحال البرتقال حيت كايوقع واحد التفاعل مابين بروتينات الحليب و حمضيات البرتقال و هادشي يقدر يأدي لعصر الهضم أو الإسهال.
16 الاشهارات و الدعايات بغاو يقنعونا بزز بلي بنادم مايمكنش ليه يعيش بلا حليب، ولكن هاد الفكرة خاطئة الفترة الوحيدة التي كايحتاج الإنسان فيها للحليب هي الرضاعة و الحليب ليكانحتاجوه فهاد المرحلة هو ديل البزيزيلة، ماشي ديال باڭيرة .
( المصادر غادي تلقاوهم فالمدونة ديالي http://alibedar.blogspot.com/ )
أنا شخصيا مابقيتش كاع غادي نشرب الحليب، إلا فجوج ديال الحالات .. فاش غانبغي نصاوب شي عصير ديال لافوكا ولا فاش غادي نمشي لشي عروبية و نطيح على شي بقيرات نقيين عالفين مزيان، ماخاسرين والو تسناو حتا تولد المدام و ديك ساعة آرا ماترضع !
هاد المقال خدا ليا 5 ديال السوايع من وقتي، كانتمنى انكم تكونوا لقيتو فيه شي حاجة مفيدة وتكون الرسالة دازت ليكم بشكل هزلي، و انكم تشاركوه و تفاعلوا معايا، ويلا ماتفاعلتوش، هانية، غادي يجي واحد النهار وغادي تفاعلوا بزز منكم، حيت هاد الإرتفاع فالأسعار ماهو إلى نقطة مابين بزاف ديال النقاط لي كايتراكمو من شحال هادي و كايزيدو يضغطوا على الشعب، و هاد التراكمات غادي تبقا تجمع .. تجمع .. تجمع .. حتى يجي واحد النهار وغادي تفرقع، و النهار لي غادي تفرقع فيه هو نهار غاد ييفيق هاد الشعب على غفلة .. و ناري على ديك الفيقة على غفلة شحال كتكون خايبة، كايفيق بنادم مخسر معمش مخلوع مغاسلش وجهو و كاعي و مقطوع، خصو غي معامن.
Vous en pensez quoi ? ca circule pas mal sur facebook en ce moment
باقي كانعقل فاش كنت صغير، كنت كانتصخر نجيب الحليب عند مول الحانوت، و كان ديك ساع الحليب عندو واحد القيمة فشكل واخا كان داير 52 ريال، كاتوصل 8 مكاتلقاهش، مول الحانوت كان ديما كايخبي الحليب ديال الزبائن ديالو حتا كايجيو ليه، و كان كايبيعو ليك بحال إلى بايع ليك الشراب، كايديرو فميكة كحلة، و كايڭوليك " سير جري، و ماتوريه لحد ! "
أنا شخصياً مكانش كايعجبني الحليب، كان كايعجبني اتاي .. اتاي بفليو .. أكثرية داك اتاي لي كان كايشيط من الفطور و كنت كانجي مع 12 من المدرسة و كنلقاه بارد .. كنت كانعطيه صلية، هو و هنريس.
فديك الوقيتة لي كنت عاطيها لأتاي، كان الحليب كايتزاد شوية بشوية و الدراري ديال الحومة حتا هوما كايطوالو شوية بشوية.. و مادربت الفڭد فراسي حتا درت 16 لعام، وكعيت كعية مقودة ملي عرفت بلي الإنسان مكايبقاش يطوال فاش كايدير 20 سنة حيت ديك الساع فات عليا الفوت.
تماك فين بديت كانسكر بالحليب ليل و صباح، و كنت فيما كانمشي نشريه كانتقاتل باش نجيب ديال الكرطون ومانجيبش ديال الميكا، حيت كنت كنقرا فلومبالاج بلي فيه الكالسيوم و الصوديوم و الحديد و البيترول و الحنكليس و داكشي ... و كنت كانتيق!
ماعليناش، تزاد الحليب... مرة جوج دريال .. مرة ربعة دريال، و المواطن مكمدها و ساكت، حيت ديك الساع ماكان لا فايسبوك لا ربيع (عربي) و هاهو اليوم ولا بسبعين ريال، و جا فايسبوك و جات رياح ديال التغيير لي من المفروض تزعزع شوية بنادم وتخليه يتحرك ... ولكن المواطن مازال ساكت، ماعدا السخط الفايسبوكي و شي محاولات متواضعة للدعوة للمقاطعة فالمواقع الإجتماعية.
ولكن بلاتي بعدة شنو هو السب ديال الزيادة ديال أسعار الحليب ؟ كولشي بدا ملي شركة "مركز الحليب" قررات تحلب شي بقر آخر من غير البقر ديال دوك المئة وعشرين ألف مربي ديالها، للتدكير، سنطرال لتيير هي لي كاتستحود على أكبر نسبة فسوق الحليب ومشتقاته، وكثر من الثلثين ديالها ملك للشركة الفرنسية دانون، لي مني جات وهي كاطير فالمدراء المغاربة و تحط بلاصستهوم الزوعر.
فالبيان ديال الشركة، ڭالت بلي كاين جوج ديال الأسباب رئيسيين :
السبب الأول : هو الزيادة فالثمن لي كاتخلصو الشركة لمربيين الابقار إبتداءً من فاتح غشت .
السب الثاني : هو الضرفية الإقتصادية العالمية لي خلات المواد الأولية ترتفع وبالتالي زادت من تكلفة الإنتاج.
وزادت كملاتها وجملاتها ملي ڭالت بلي هامش الربح ديالها ماغاديش تستافد منو هي حيت غادي يطلع غير من 0.24 ل 0.25 ..
دابا خلينا من هاد الزواق كامل، جوج ديال الشركات لي شادين أكبر نسبة فالسوق محتاكراه أقلية، سنطرال 63% و كوباك 20% الأولى زادت فالأسعار على غفلة و الثانية تبعاتها من بعد 24 ساعة ، واش هادشي مكايخليناش نڭولو بلي القاضية عاجنينها و خابزينها بيناتهم ؟ وبلي كاين إتفاق على الأسعار، وهادشي كايتعتابر من الممارسات المانعة للمنافسة و لي المتضرر الأول منها هو المستهلك.. عاد الشركات الصغرى، ولكن فهاد الحالة الشركات الصغرى غادي تتبع جودة و سنطرال باش تحافض على الأرباح ديالها . و فاش الصحافة سولات المدير العام ديال كوباك قاليهم " مكاين حتا شي إتفاق على الأسعار وبلي " هاد الإرتفاع كان منتظر من شحال هادي، غير سنطرال دارتو البارح و حنا درناه ليوم" هادا ماكان .. يعني بالعربية حتى هو #مفراسوش.
ههههه عالام فالوقت لي كانكتب فيه هاد الجملة سقت الخبار بلي واحد التعاونية ديال الحليب كاينة فتطوان سميتها COLAINORD حتا هي زادت فالحليب.
دابا واش الحكومة عندها دخل فهادشي ؟ الصورة لي كاتبان هي أن الحكومة ماعندها دخل فهاد الشي، فرعوا لينا راسنا بالسوق (الحرة) و الشركات الخاصة و قانون العرض والطلب و القيامة الكحلة... ولكن أنا لي عارف هو أن الحكومة من مسؤولتها الحفاض على القدرة الشرائية للمواطن، ولكن بلاتي ! حنا ماعندناش حكومة، حنا عندنا خريوة جارية خوينزة غادة وكاتقصاح و كاتكحال و كاتجمع عليها الدبان .. حنا عندنا شعب مضرور و هازو حتا القاع و ساكت و صابر .. حنا عندنا لوبيات وشركات كايديرو مابغاو فالسوق، كايديرو مابغاو فالبلاد، و كايتحكمو فالسياسة و فالسياسيين عن طريق النفود ديالهم ... حنا عندنا سياسيين ماشي رجال، مكايدافعوش على مصالح الشعب ولكن كايدافعو على مصالح بعضياتهم .. مكايبكيوش على المواطن الضعيف لي ربعة دريال تقدر تزعزع ليه العيش ديالو اليومي، ولكن كايبكيو على الفلوس و المناصب و الامتيازات، حنا عندنا صحافة و إعلام مكايعطيوش قيمة لبحال هاد الأحداث و مكايعبئوش ليها... حنا عندنا شعب مازال ماقادرش يقاطع واخا عارف بلي هاداكشي لي كايشرب أصلاً راه ماشي حليب، حنا عندنا طبقة (متوسطة) لي كاتقول " وا ربعادريال مادات ماجابت" و معرفاش بلي ديك الربعة دريال إلى ضربتيها ف جوج و عاود ضربتيها فواحد 900 مليون لتر ديال الحليب سنوياً راه كاتولي ملاير .. ملاير .. ملاير .. وفين كايمشيو هاد الفلوس ؟ لا لا، مكايمشيوش عند المربيين ديال الأبقار، حنا را ماشي بڭر باش يدوزوها علينا .. حنا را ماشي مازال كانرضعو البزولة (واخا ماكرهناش نرضعوها دابا نيت اللهم هي ولا هاد الحليب ديال الغبرة) دوك الفلوس كايمشيو لجيوب الشركات الرأسمالية الكبرى لي دايرة مابغات، دوك الفلوس كيزيدو يغنيو الأغنياء وكايزيدو يفقرو الفقراء، دوك الفلوس راكم كاملين عارفعينهم فين كايمشيو وساكتين.
بنادم كايسحاب ليه بلي المقاطعة ماغاتنفع فوالو و بلي الشركات ماغاديش يتأثرو إلى 400.000 مغربي و مغربية قاطعو، هي بصح ماغادي تنفع فوالو إلى بقينا كانقولو بلي ماغتنفع فوالو. ولكن إلى كل واحد من هادوك الربعمية ألف واحد قاطع، و أثر على المحيط ديالو باش يقاطع ديك الساعة عاد غادي تكون شي نتيجة، كاينين شي ناس مؤثرين لي منا و بحالنا، كيڭولو بلي هوما ولاد الشعب، عندهم مئات الآلاف فالمواقع الإجتماعية، و ديما كايبقاو يهدرو بسميت الشعب. إلى جا غير 1% منهم وسخر دوك الطاقات لي عندو للدعوة للمقاطعة، واهلي فين غانوصلو . يمكن مايقدروش حيت خصهم غير يضحكوا (على) بنادم و يربحو فليسات على ضهرو و صافي حدك تم.
المغاربة ماعارفينش بلي إلى نزلو المبيعات ديال الحليب غير ب 40% ف 48 ساعة را غادي تكون كارثة و خسارة فادحة للشركات، حيت الحليب منتوج لي المدة الإستهلاكية ديالو قصيرة بزاف، و الخسارة مايمكينش ليها تعوض ببيع نفس المنتوج لاحقا.
هادشي علاش قلبت ليكم على 16 لسبب غادي يشجعوكم باش تقاطعو الحليب أو تنقصو من إستهلاكو :
1 - هادك شي لي كاتشربو را ماحليب ما تا تلعبة، هاداك سميتو " الماء و جالالة " خلاتها الحاجة، مايدوخوكومش بديك ISO 9001 را ماكاين والو من داكشي.
2 - واش بالرجولة كايسحاب ليكم بلي البقر ديال المغرب قادر ينتج كثر من 3 مليون لتر من الحليب الصافي يوميا ؟
3- هداك الحليب ديال ابقار لي العلف ديالها أصلاً ماشي طبيعي 100% و كايحتاوي على مواد كيميائية و مواد حافظة و بزاف ديال الماء.
4 - الحليب ديال اليوم عامر بالهرمونات و الأوساخ لي كاتناولها الأبقار و كايئثر هادشي على الأجهزة ديال أجسامنا.
5 - مامزيانش دير عصير ديال الفواكه بالحليب،حيت ماكايخليكش تستفد من الفوائد ديالها.
6 - مامزيانش دير شاي بالحليب، حيت الحليب كايفقد للشاي التأثير الإيجابي ديالو على الأمعاء.
7 - مامزيانش تشرب القهوة مع الحليب، حيت كاتساعد فتفاقم مشكلة نخر الأسنان. و فاش كايتخلط الكافيين مع الكازئين كاتصعاب عملية الهضم.
8 - مامزيانش تشرب الحليب قبل أو بعد الدواء، حيت كايوقع واحد التفاعل الكيميائي مابين الكلسيوم و المعادن لي فالدواء، وهادشي كيمنع متصاص الدواء.
9 - مامزيانش تشرب الحليب و الشكلاط،حيت الحليب فيه الكالسيوم ، و الشكلاط فيه حامض الأكساليك، وفاش كاتخلطهوم بجوج كتصنع واحد اللعيبة سميتها كلسيوم الأكساليك، وهادي إلى دابت ليك أجي دفل عليا، تقدر دير ليك فتجفف الشعر، الإسهال أو بطء النمو.
10 - كاين شي بلدان لي نسبة الإستهلاك ديالهم للحليب و مشتقاته ضئيلة بحال الصين و مكايعانيوش من الأمراض لي كايسببها الحليب بالشكل لي كتعاني منو البلدان لي كتستهلك الحليب بزاف.
11 - كاين بزاف ديال العلماء لي كايرجحو أن الحليب له علاقة بأمراض السرطان الشائعة بحال سرطان الثدي،سرطان الأمعاء، وسرطان البنكرياس.
12 - 70 بالمائة من سكان العالم ماكايقدروش يهضمو اللاكتوز (سكر الحليب)، و إلي كايتسبب فعدة مشاكل صحيَّة.
13 - بروتينات حليب الأبقار تعد هي السبب الرئيسي لأمراض السكري لدى الأطفال فميريكان.
14- الحليب كايسد العروق والشرايين و كايلصق الكولسترول العاطل.
15 - الحليب كايمنعكم من تناول الفواكه لي درجة الحموضة فيها قل من 4.6 بحال البرتقال حيت كايوقع واحد التفاعل مابين بروتينات الحليب و حمضيات البرتقال و هادشي يقدر يأدي لعصر الهضم أو الإسهال.
16 الاشهارات و الدعايات بغاو يقنعونا بزز بلي بنادم مايمكنش ليه يعيش بلا حليب، ولكن هاد الفكرة خاطئة الفترة الوحيدة التي كايحتاج الإنسان فيها للحليب هي الرضاعة و الحليب ليكانحتاجوه فهاد المرحلة هو ديل البزيزيلة، ماشي ديال باڭيرة .
( المصادر غادي تلقاوهم فالمدونة ديالي http://alibedar.blogspot.com/ )
أنا شخصيا مابقيتش كاع غادي نشرب الحليب، إلا فجوج ديال الحالات .. فاش غانبغي نصاوب شي عصير ديال لافوكا ولا فاش غادي نمشي لشي عروبية و نطيح على شي بقيرات نقيين عالفين مزيان، ماخاسرين والو تسناو حتا تولد المدام و ديك ساعة آرا ماترضع !
هاد المقال خدا ليا 5 ديال السوايع من وقتي، كانتمنى انكم تكونوا لقيتو فيه شي حاجة مفيدة وتكون الرسالة دازت ليكم بشكل هزلي، و انكم تشاركوه و تفاعلوا معايا، ويلا ماتفاعلتوش، هانية، غادي يجي واحد النهار وغادي تفاعلوا بزز منكم، حيت هاد الإرتفاع فالأسعار ماهو إلى نقطة مابين بزاف ديال النقاط لي كايتراكمو من شحال هادي و كايزيدو يضغطوا على الشعب، و هاد التراكمات غادي تبقا تجمع .. تجمع .. تجمع .. حتى يجي واحد النهار وغادي تفرقع، و النهار لي غادي تفرقع فيه هو نهار غاد ييفيق هاد الشعب على غفلة .. و ناري على ديك الفيقة على غفلة شحال كتكون خايبة، كايفيق بنادم مخسر معمش مخلوع مغاسلش وجهو و كاعي و مقطوع، خصو غي معامن.
Vous en pensez quoi ? ca circule pas mal sur facebook en ce moment
