netci Amedyaz, ghessegh ad sefrugh s
tmazight, ghessegh ad sestnegh iman
nnew s tmazight, ghessegh ad ferregh fella s tmazight.
tupa tutlayt tamezwart, yemlettet s tutlayt n tasusmi, d nit yuggur in twala n taourt teqqes, taourt n gaji, gaji yella di mmas n kazerma, iddrun dis nyten illesnin, nit d wujrit nnes, mammu iywella amdukel.
Tanfust nnegh muc am tinfas tyaytv, tanfust nnegh itutla af.... welyuc m nessin af may ittutla, idjut negh di ammas n askil nnes immira, balek ad nakez af may ittutla:
sugges: 1900 negh balk 2900, mi nessen lemmi.
tmura: wil tellac di ammas n warra n murawin mammu illan: masinnissa d amazigh many illan: kazerma itsiwlun ghfes d immalun, kazerma dis tagda ad tsagged mammu wil yettagedc, d dis ayedder mammu wil yettederc, dis mettent n mammu wil yettemutc.
Yefka sen argaz wil ghrec wudem mensi, negh balek nit mekli, mi isnun ghfes may nit, imrawen ittazlun in brra n gaji, ma ca in gaji imira tuded af imira wudjut, af zegni n iytv, si ikmun, d patugur in izzat lemmy ad ufghun.
may iysekmak dapa cek? iysesten mazigh masinnissa di ammas n iman nnes, d yerni:
d cek may lesm nnek?
yerru ghfes masinnissa am illy yeslut:
lesm nnew masinnissa, d tilelli tsekmyyed dapa.
mammmek?
iysestent mazigh:
way, wuzlegh deffer tilelli, wufygh tet tella dap, tella di ammas n kazerma.
yerru ghfes masinnisa:
ma ca imluned tilelli tella di ammas n kazerma tummut, wil tedderc yemlas mazigh.
Susmen illesnin, susmun wussan, susmun ansi ittan mammek yettutla amdan, yutva s iles nsen askil deffer waytv, d waytv, inghun tasusmi si yemlu wudjun sisen in widi di tellelt wudjut.
d mammek hanufegh?
yerru masinnisa af sestnensen illesnin s sisten waytv:
d mammu iysekm negh dapa?
yemlas mazigh: tilelli itsekm cek dapa, cek temlyd, ma ca ittvunted ghfes, mammek awal wupa?
yerru ghfes masinnisa d yemlu: d cek may iysekmak dapa?
yemlas mazigh: lesm nnew.
lesm nnek!, mammek? mammek lesm n amdan ad tesekm many wil illanc wudan?
iysestent masinnissa:
lesm nnew amazigh, yerru ghfes mazigh.
iysussum masinnissa, iysussem d yezvru wudem n mazigh, maca wil yufutc yella denneg tukrimt nnes, yussd payenced af wudem nnes many yugur, maca yetta may iysuwel ghfes.
cek, negh cem, negh balek cekwen, ekwent, nit, nitan, nitant, niyat.
dapa iysesten mazigh d iyzun ibrid zzat ittay nnes:
may dis deffer tasusmi nnek? wil ittagedc, wil ittaghedc gher s yakuc, d ilya wil itagdudc s yakuc, agged s zzel.
dis tawalin ittugh tajurrumt nnsen, wil ghessunc ad uffghun, tawalin paywtva didsen iles nnew ilya ad tenmlegh.
yerru masinnissa:
d may nit askil nnsen.
yemlas mazigh:
askil nnsen iytutla s tulayt wil ghessun tt ighliden n tmurawin many tella ad tememmel.
yerru ghfes masinnissa:
askil n tifinagh?
iysestent mazigh:
way, askil n tifinagh.
yerru ghfes masennissa:
maca.
yemlu mazigh:
maca askil n tifinagh d askil galuz, wil- temmaryc sis tghawsa tatrart, tghawsa taminut, askil yummut, yummut di ammas n wulawen n wudan qebel ma ayummut di ammas n warra.
mammek?
iysestent masennissa:
saha islygh imusnawen n imazighen mmalun, ameqranen immalun in imeckanen, tifinagh nit askil n tira n nanna, tira n dadda, maca assa dis askil waytv yettary di tmeddert nnegh, askil uri sis amusnaw af tilelli, si yemlu ussem n memmis, d yezga "shut up" af tametvutis, si yemlu iqqes immy nnem a yelli, ghessegh ad arygh af tilelli.
yemlas u mazigh.
si yemlas mazigh tawalin tyupa, yuss d mazigh hayer, maca mi yukez may aymel, d yemlu di ammas n iman nnes:
mmy yeqqes wil ikamunac wuzan.
d iysussum, d s ass wyha, tasusmi bes may issalun dis, masinnissa, d mammu ittan wudan sywel ghfes s lesm n mazigh