قيل لأحد طلبة الطب: هل ستحضر حفل زفاف فلان ؟
فأجاب: لا ماماشيش -
علاش ؟ عندك القراية ؟ غاتراجع دروسك ؟ -
لا ماشي ديكشي.. بغيتيني نمشي ويقولولي الناس عاوتاني شمن تخصص درتي أولا فوقاش غتسالي القراية أولا فوقاش غنفرحو بيك ؟
ولا بغيتيني نمشي و إيلا سخف شي حد ولا شرg يجيوا عندي باش نديرلو الإسعافات الأولية ؟
ولابغيتيني نمشي وإيلا شي حد جاتو الهيستيريا يجيو عندي باش نداويه ؟
ولا بغيتيني نمشي, باش اللي ضرو راسو يقولي واش عندك دوليبران واللي جرات عليه كرشو يقولي واش عندك سمكطا, بحال إيلا أنا صيدلية متنقلة ؟
ولابغيتيني نمشي, وتجي عندي شي مرا باطوزة وتسولني واش كوكا كولا غتضرها ولامن الأحسن تشرب والماس ؟
ولابغيتيني نمشي و يجي شي صاحبي من يامات الابتدائي وهو هاز بنتو اللي عندها ست سنين ويقولي: هاهيا خطيبتك, غنخليهالك حتا تتخرج يالله تكون وجدات ؟
ولا بغيتيني نمشي, وتبقا شي بنت زوينة تديرلي النظرات والحركات حيت قالولها أنا سي الدكتور ولكن ماعارفاش بلي الواليد هو اللي كيخلصلي فلوس الكوافور ؟
ولا بغيتيني نمشي, ويجي عندي شي راجل شارف هارف, ويغمزلي ويقولي: الموطور عندي بارد.. مانلقاش عندك شي دوا ؟ فهمتيني ولا لا
؟
ولابغيتيني نمشي, ويجيوا الناس يقولولي : جمع راسك.. نجاوبهوم أنا: ماباغيش نتجوج.. فيقولولي: لا جمع راسك باش تٌخرٌج ونجيوا عندك ندوزوا فابور... أجي بعدا عندك دابا باش تقيسلينا الطونسيون ؟
لا أسيدي ماماشيش بناقص.. غنقولهوم نيت بلي عندي امتحان وخاصني نراجع